Grupi parlamentar i Frontit Europian ka dorëzuar në Kuvend propozim-ligjin për ndryshime dhe plotësime të Ligjit për Provimin e Jurisprudencës, duke kërkuar që ky provim të zhvillohet edhe në gjuhën shqipe. Deputetja e BDI-së, Rina Ajdari, tha se refuzimi i Ministrisë së Drejtësisë për mbajtjen e provimit në shqip cenon barazinë gjuhësore dhe juridike, si dhe godet themelet e rendit kushtetues dhe bashkëjetesës ndëretnike në vend.

Sipas saj, ministri i Drejtësisë po vendoset mbi Kushtetutën dhe ligjin, duke shkelur parimet e shtetit të së drejtës. Ajdari bëri të ditur se krahas këtij propozim-ligji, Fronti Europian ka dorëzuar edhe ndryshime në ligjin për noterim dhe në ligjin për përmbarim.

Ndërkohë, zëvendëskryeministri i parë, Bekim Sali, deklaroi se ligji aktual, në fuqi që nga janari i vitit 2020, ka defekte pasi nuk e përcakton gjuhën në të cilën duhet të jepet provimi i jurisprudencës. Ai theksoi se VLEN mbështet kërkesën e studentëve shqiptarë dhe se gjuha shqipe, si gjuhë zyrtare, duhet të respektohet në përputhje me Kushtetutën.

Procedurë për këtë çështje ka hapur edhe Avokati i Popullit, i cili ka paralajmëruar shqyrtim të veprimeve të Ministrisë së Drejtësisë dhe zbatimit të Ligjit për Përdorimin e Gjuhëve. Në mbështetje të studentëve ka reaguar edhe ambasadori i Shqipërisë në Maqedoninë e Veriut, Denion Meidani.

Ministria e Drejtësisë, nga ana tjetër, arsyeton refuzimin me pretendimin se provimi i jurisprudencës shërben si test për njohjen aktive të gjuhës maqedonase.