Presidenti i Shteteve të Bashkuara, Donald Trump, ka lansuar një faqe të re zyrtare të qeverisë, TrumpRx.gov, me qëllim uljen e kostove të barnave me recetë për qytetarët amerikanë. Platforma, e prezantuar nga Shtëpia e Bardhë, liston mbi 40 ilaçe nga pesë kompani të mëdha farmaceutike, të cilat kanë arritur marrëveshje çmimesh me administratën Trump.

Sipas presidentit, reduktimi i çmimeve do të jetë i ndjeshëm. “Do të kurseni një pasuri,” u shpreh Trump, duke e cilësuar iniciativën si “një hap shumë pozitiv për kujdesin shëndetësor në përgjithësi”. Ai përmendi politikën e tij “Most Favored Nation”, si arsye kryesore që bëri të mundshme këtë ulje çmimesh, duke siguruar që Shtetet e Bashkuara të mos paguajnë më shumë se vendet e tjera.

Përdoruesit e TrumpRx.gov mund të kërkojnë ilaçin që u nevojitet, të shkarkojnë kuponin përkatës dhe ta përdorin atë në farmaci për të përfituar çmimin e reduktuar. Platforma premton ofrimin e “çmimeve më të ulëta në botë për barnat me recetë” dhe synon të lehtësojë barrën financiare për amerikanët që kanë nevojë për medikamente.