Kabul – Talibanët kanë miratuar një kod të ri penal që ndryshon mënyrën e ndëshkimit për dhunën në familje, duke lejuar në praktikë përdorimin e dhunës ndaj grave dhe fëmijëve, raportojnë mediat ndërkombëtare. Sipas ligjit, dhuna konsiderohet krim vetëm kur shkaktohet dëmtim i rëndë fizik, si fraktura, dhe dënimi maksimal është 15 ditë burg.

Kodi i ri penal kushtëzon ndjekjen penale nga fakti që gruaja duhet të provojë dhunën në gjykatë, ndërsa ligji i ndalon grave të dalin nga shtëpia pa lejen e burrit ose babait dhe dënon ekspozimin e trupit në publik. Për vizita familjare pa leje të bashkëshortit, gruaja mund të përballet me deri në tre muaj burg.

Ky zhvillim nxjerr në pah kufizimet ekstreme ndaj grave në Afganistan, ku shkollimi dhe liria e lëvizjes janë të ndaluara që nga marrja e pushtetit nga Talibanët dhe zbatimi i sheriatit si ligj kryesor.