Presidenti i Shqipërisë, Bajram Begaj, në kuadër të vizitës së tij zyrtare në Republika e Maqedonisë së Veriut, u prit në takim edhe nga kryeministri i vendit, Hristijan Mickoski.

Gjatë bisedimeve u diskutua për perspektivat e thellimit të bashkëpunimit dypalësh, për rritjen e koordinimit rajonal dhe për përshpejtimin e procesit të integrimit europian. Një vëmendje e veçantë iu kushtua bashkëpunimit ekonomik, ndërlidhjes energjetike dhe projekteve konkrete që ndikojnë drejtpërdrejt në mirëqenien e qytetarëve të të dy vendeve.

Në takim u theksua rëndësia e organizimit të aktiviteteve të përbashkëta me odat ekonomike, intensifikimi i vizitave zyrtare dhe nxitja e kontakteve të drejtpërdrejta ndërmjet institucioneve dhe komunitetit të biznesit, si mekanizma praktikë për forcimin e marrëdhënieve dhe për rritjen e investimeve.

Po ashtu, u vlerësua roli i shqiptarëve në Maqedoninë e Veriut si komunitet shtetformues dhe si urë lidhëse e qëndrueshme me Shqipërinë. Ata u cilësuan faktor kyç në orientimin euroatlantik të vendit dhe kontribuues të rëndësishëm në stabilitetin politik, bashkëpunimin rajonal dhe perspektivën europiane.

Takimi konfirmoi vullnetin e përbashkët për të avancuar partneritetin strategjik mes dy vendeve, me theks në projekte konkrete dhe në një vizion të qartë për të ardhmen europiane të rajonit.