Pas një beteje disa vjeçare për drejtimin e Partia Demokratike e Shqipërisë, përplasja mes Lulzim Basha dhe Sali Berisha ka marrë një kthesë përfundimtare. Ish-kryetari i PD-së ka hequr dorë nga mbajtja e simboleve dhe logove të kësaj force politike, duke i hapur rrugë rikthimit të plotë të identitetit zyrtar të partisë.

Së fundmi, Partia Demokratike njoftoi se ka marrë kontrollin edhe të faqes në Facebook me rreth 320 mijë ndjekës, e cila mbante emrin “Demokratët Euroatlantikë” dhe më herët ishte identifikuar si faqja zyrtare e PD-së.

Në njoftimin e publikuar thuhet se “Partia Demokratike e Shqipërisë lajmëron riaktivizimin e faqes tonë origjinale në Facebook. Në vijim të vendimit të formës së prerë të Gjykatës së Apelit të Juridiksionit të Përgjithshëm Tiranë, Vendimi Nr. 723, datë 11 qershor 2024, i cili konfirmoi të drejtat ligjore mbi emrin, vulën dhe simbolet e Partisë Demokratike të Shqipërisë, bëjmë me dije se emërtimi i përkohshëm në faqen e Facebook, Demokratët Euroatlantikë, do të ndryshohet në Partia Demokratike e Shqipërisë për të reflektuar emrin e ligjshëm të institucionit”.

Konflikti për drejtimin dhe simbolet nisi pas rikthimit të Berishës në krye të partisë në vitin 2022, duke u shoqëruar me procese të gjata gjyqësore. Pas disa vendimeve në të gjitha shkallët e gjyqësorit, Basha u largua dhe krijoi subjektin e tij politik.

Tashmë, me dorëzimin edhe të faqes zyrtare në rrjetet sociale, mbyllet një kapitull i gjatë përplasjesh brenda së djathtës shqiptare.