Kryetari i BDI-së, Ali Ahmeti, përmes një postimi në rrjetet sociale ka kujtuar sot 28-vjetorin e rënies heroike të familjes Jashari, një ngjarje që mbetet simbol i krenarisë dhe kujtesës kombëtare për shqiptarët anë e mbanë botës.

“Për çdo shqiptar, anë e mbanë botës, datat 5, 6 dhe 7 mars janë ditë të krenarisë dhe kujtesës kombëtare, ditë kur përkujtojmë përvjetorin e Epopesë së Ushtrisë Çlirimtare të Kosovës, një nga ngjarjet më të rëndësishme të historisë bashkëkohore të popullit tonë. Në këto ditë të shënuara kujtojmë me respekt dhe nderim luftën e lavdishme të komandantit legjendar, Adem Jasharit, i cili së bashku me familjen e tij, me prindër, vëllezër, gra e fëmijë, me “besa besë” e me trimëri të pashoq, luftuan përballë forcave të armikut dhe sakrifikuan jetën heroikisht për lirinë dhe pavarësinë e Kosovës”, shkruan Ahmeti.

Ai thekson se Epopeja e UÇK-së mbetet simbol i qëndresës, unitetit dhe sakrificës, ndërsa gjaku i derdhur në Prekaz dhe anë e mbanë Kosovës na obligon që të ruajmë dhe forcojmë lirinë, të punojmë për unitet kombëtar dhe për një të ardhme më të mirë për brezat që vijnë.