Zyrtarët doganorë në Aeroportin Ndërkombëtar të Shkupit kanë zbuluar një shumë të madhe parash të padeklaruara gjatë kontrollit të një pasagjeri të huaj që po udhëtonte drejt Londrës.

Gjatë kontrollit rutinë, tek pasagjeri u gjetën gjithsej 150 mijë paund britanikë që nuk ishin deklaruar sipas detyrimeve ligjore për transportimin e parave të gatshme përtej kufirit.

Sipas Ligjit për Punë Devizore, autoritetet i kthyen udhëtarit një shumë në kundërvlerë prej 10 mijë eurosh, ndërsa pjesa tjetër prej 141,315 paund britanikë u mbajt përkohësisht nga autoritetet doganore.

Nga Drejtoria e Doganave njoftojnë se ndaj personit është ngritur kallëzim përkatës për kundërvajtje, ndërsa procedurat ligjore janë në vijim.

Autoritetet theksojnë se kontrollet e tilla janë pjesë e aktiviteteve të vazhdueshme për zbulimin dhe parandalimin e transferimit të paligjshëm ndërkufitar të parave të gatshme, duke kontribuar në luftën kundër krimit financiar.