Dy persona kanë përfunduar në Policinë e Tetovës nën dyshimin për kërcënime në rrjetet sociale ndaj nxënësve dhe shkollave të mesme në qytet. Njëri prej tyre ishte ndaluar edhe më herët për të njëjtën vepër.

Sipas informacioneve nga autoritetet, personi i parë është një 18-vjeçar nga Pallatica e Tetovës, i cili ishte arrestuar edhe më 27 shkurt për dyshime të ngjashme. Ndërkohë, personi i dytë është një 15-vjeçar nga fshati Xhepçisht.

I mituri dyshohet se në rrjetet sociale ka publikuar fotografi ku shihen edhe armë, duke kërcënuar se do të kryejë vrasje në shkollën e mesme të mjekësisë dhe në gjimnaz.

Sektori i Punëve të Brendshme në Tetovë ka realizuar bastisje në shtëpitë e të dyshuarve, ku janë gjetur edhe prova që lidhen me rastin. Autoritetet po vazhdojnë hetimet për zbardhjen e plotë të ngjarjes.