Ministri i Punëve të Brendshme i Maqedonisë së Veriut, Panče Toshkovski, deklaroi se reagimi i përbashkët i institucioneve shtetërore dhe sektorit shëndetësor dëshmoi se vendi është i aftë të përballet me situata të vështira kur ekziston koordinim dhe përkushtim i përbashkët.

Ai i bëri këto komente gjatë panelit të parë “Mekanizmi evropian i mbrojtjes civile dhe përgjigja ndërkombëtare: Koordinimi, solidariteti dhe përvojat”, në kuadër të konferencës ndërkombëtare për aspektet institucionale dhe klinike dhe zgjidhjet pas zjarrit në Kočani, e cila po mbahet në Shkup.

Toshkovski shprehu ngushëllime për familjet e viktimave dhe falënderim për të gjithë ata që kontribuan në përballimin e tragjedisë, duke theksuar se solidariteti dhe gatishmëria për të ndihmuar kanë qenë vendimtare për reagimin institucional.

“Besoj se solidariteti, hapja dhe gatishmëria për të ndihmuar ishin thelbësore që ne të mund të përgjigjemi në mënyrë sa më adekuate ndaj gjithçkaje që ndodhi, e cila ishte një tragjedi e madhe”, u shpreh ai.

Ministri theksoi gjithashtu rëndësinë e stërvitjeve të përbashkëta institucionale për reagim në raste emergjente. Sipas tij, një ushtrim simulues për mbrojtjen civile, i realizuar më 1 shkurt 2025 në zonën Kadino në Shkup, ku u simulua një aksident i rëndë trafiku me shumë viktima, ka shërbyer si përvojë e vlefshme për institucionet që morën pjesë.

Në këtë stërvitje morën pjesë përfaqësues të Ministrisë së Punëve të Brendshme, Ministrisë së Shëndetësisë, Kryqit të Kuq dhe shërbimit zjarrfikës të qytetit, të cilët ushtruan reagimin e koordinuar në situata emergjente.

Ai bëri të ditur se në ditën e tragjedisë dhe në ditët pas saj, Ministria e Punëve të Brendshme angazhoi rreth 3 mijë policë që siguruan vendin e ngjarjes, kryen hetimet dhe ndihmuan në transportimin e të lënduarve drejt institucioneve shëndetësore.

Në përfundim, Toshkovski shprehu shpresën që tragjedi të tilla të mos përsëriten më në të ardhmen.