Në Prishtinë u zhvillua një takim mes Kryetares së Kuvendit të Republikës së Kosovës, Albulena Haxhiu, dhe anëtarëve të Këshillit Drejtues të Lëvizjes Arbëria, Meral Ferati, Bekim Fazliu dhe Azem Dehari.

Gjatë takimit, përfaqësuesit e Lëvizjes Arbëria e uruan Haxhiun për zgjedhjen në krye të Kuvendit, duke i dëshiruar suksese në ushtrimin e detyrës dhe në përmbushjen e përgjegjësive institucionale në shërbim të qytetarëve dhe të forcimit të institucioneve demokratike të vendit.

Në bisedë u trajtuan zhvillimet aktuale politike në Kosovë dhe në rajon, si dhe rëndësia e bashkëpunimit ndërmjet faktorëve politikë shqiptarë për forcimin e institucioneve demokratike dhe avancimin e proceseve politike me interes të përbashkët.

Përfaqësuesit e Lëvizjes Arbëria theksuan gjithashtu nevojën për koordinim më të madh politik dhe institucional për çështje me interes kombëtar, si dhe për thellimin e bashkëpunimit ndërshqiptar në të gjitha nivelet.

Në përfundim të takimit, palët u dakorduan që komunikimi dhe bashkëpunimi të vazhdojë edhe në të ardhmen për tema dhe iniciativa me interes të përbashkët.