Përdorimi i inteligjencës artificiale nga të rinjtë po rritet me ritme të shpejta, duke sjellë ndryshime të dukshme edhe në procesin mësimor. Sipas të dhënave të Eurostat, rreth dy të tretat e të rinjve të moshës 16 deri në 24 vjeç në Bashkimin Evropian kanë përdorur programe të inteligjencës artificiale, kryesisht për të mësuar, për të shkruar tekste dhe për të kërkuar informacion.

Një shembull konkret vjen nga qyteti i Kriva Palanka, ku mësuesi Dobri Jovevski po e integron këtë teknologji në përgatitjen e orëve të mësimit. Në vend të kërkimit të gjatë në libra, ai përdor programe të inteligjencës artificiale për të krijuar materiale të personalizuara për nxënësit.

“Inteligjenca artificiale mund ta përmirësojë realisht arsimin nëse përdoret me mençuri dhe me një qëllim të qartë pedagogjik”, thotë ai, duke shtuar se kjo teknologji e ndihmon të përgatisë materiale më shpejt dhe të përshtasë aktivitetet sipas niveleve të ndryshme të nxënësve.

Sipas tij, përdorimi i mjeteve digjitale e rrit ndjeshëm angazhimin në klasë. “Shpesh krijoj lojëra digjitale edukative duke përdorur Canva dhe Gemini, kjo i bën orët më interaktive dhe tërheqëse, sepse nxënësit mësojnë përmes lojës, eksplorimit dhe zgjidhjes së problemeve”, thekson Jovevski.

Fenomeni nuk është më i izoluar, por po bëhet pjesë e përditshmërisë në klasa në mbarë botën. Nga chatbot-et te sistemet e analizës së të dhënave, inteligjenca artificiale po ndryshon mënyrën e mësimdhënies dhe të vlerësimit.

Megjithatë, përballë këtij zhvillimi të shpejtë, mbetet një pyetje thelbësore, a është sistemi arsimor gati për këtë transformim teknologjik?

Burimi: Radio Free Europe/Radio Liberty