Presidenti amerikan Donald Trump ka rikthyer në vëmendje mundësinë e tërheqjes së Shtetet e Bashkuara nga NATO, duke ngritur pikëpyetje mbi të ardhmen e sigurisë perëndimore në një kontekst të tensionuar global.

Megjithëse një vendim i tillë nuk është i thjeshtë, pasi kërkon miratimin e dy të tretave të Senatit ose një ligj nga Kongresi sipas “National Defense Authorization Act” të vitit 2024, paqartësitë kushtetuese mbi tërheqjen nga traktatet lënë hapësirë për përplasje institucionale mes presidentit dhe Kongresit.

Në planin ndërkombëtar, procedura mbetet më e drejtpërdrejtë, pasi neni 13 i traktatit të NATO-s lejon largimin e një shteti me njoftim zyrtar, që hyn në fuqi pas 12 muajsh, pa nevojë për miratim nga vendet e tjera anëtare.

Megjithatë, ekspertët vlerësojnë se edhe pa një dalje formale, një administratë skeptike mund të dobësojë funksionimin e aleancës nga brenda, duke reduktuar angazhimin ushtarak dhe duke vënë në dyshim parimin e mbrojtjes kolektive, për të cilin thuhet se “gjithçka varet nga vullneti politik dhe nga besueshmëria”.

Një skenar i tillë do të kishte pasoja të thella për Evropën, veçanërisht në aspektin e sigurisë në lindje, ndërsa aktorë si Rusia dhe Kina mund të përfitonin nga çdo dobësim i unitetit perëndimor.