Kanë dështuar negociatat ndërmjet kryeministrit Albin Kurti dhe kryetarit të LDK-së, Lumir Abdixhiku, për arritjen e një marrëveshjeje lidhur me zgjedhjen e presidentit, duke mbyllur kështu edhe zyrtarisht takimet mes dy subjekteve politike për këtë çështje.

Sipas ofertave të paraqitura, Vetëvendosje i kishte propozuar LDK-së postin e zëvendëskryeministrit dhe katër ministri, ose alternativisht postin e kryetarit të Kuvendit, por këto oferta janë refuzuar nga LDK-ja.

Kreu i LDK-së, Lumir Abdixhiku, ka deklaruar se kryeministri Kurti ka insistuar që pozita e presidentit t’i takojë Vetëvendosjes, gjë që sipas tij ka qenë e papranueshme për partinë që ai drejton.

Ndërkohë, Kurti ka bërë të ditur se i ka dërguar mesazh për takim kreut të PDK-së, Bedri Hamza. Kjo parti pritet të marrë vendim pas mbledhjes së Këshillit Drejtues, ndërsa ka kërkuar që ftesa të bëhet në formë zyrtare me shkrim për të shqyrtuar mundësinë e vazhdimit të negociatave.

Me vetëm tetë ditë të mbetura nga afati kushtetues për zgjedhjen e presidentit, situata politike mbetet e paqartë, ndërsa në rast të mosarritjes së marrëveshjes vendi mund të shkojë në zgjedhje të reja.