Ish-presidentja e Kosovës, Vjosa Osmani, ka vlerësuar si moment historik vendimin e Kuvendit të Kosovës për ratifikimin e marrëveshjes që e bën vendin pjesë të Bordit të Paqes. Sipas saj, ky hap forcon subjektivitetin ndërkombëtar të Kosovës dhe e pozicionon atë në mesin e shteteve që kontribuojnë për paqen globale.

Osmani theksoi se ky zhvillim është dëshmi e partneritetit të ngushtë me Shtetet e Bashkuara të Amerikës, duke kujtuar edhe rolin historik të SHBA-së në Kosovë.

“Faleminderit SHBA-ve dhe Presidentit Trump për besimin dhe ftesën që të jemi shtet themelues i Bordit të Paqes”, u shpreh Osmani.

Ajo rikujtoi gjithashtu ndërhyrjen e NATO-s në vitin 1999, duke e cilësuar SHBA-në si faktor vendimtar në ndaljen e dhunës dhe në mbështetjen e Kosovës drejt lirisë dhe pavarësisë.

Sipas saj, angazhimi amerikan mbetet i rëndësishëm edhe sot, në forcimin e pozitës ndërkombëtare të Republikës së Kosovës.