Në Gjykata e Posaçme kundër Korrupsionit dhe Krimit të Organizuar këtë të hënë ka nisur gjykimi në themel ndaj ish-presidentit të Shqipërisë, Ilir Meta, dhe ish-bashkëshortes së tij, Monika Kryemadhi, së bashku me tre të pandehur të tjerë në të njëjtën dosje hetimore.

Meta përballet me akuza për pastrim parash, korrupsion pasiv dhe fshehje pasurie, ndërsa ka kërkuar që seancat gjyqësore të transmetohen drejtpërdrejt për publikun, duke argumentuar nevojën për transparencë të plotë në proces.

Në një kërkesë drejtuar më herët gjykatës, ai ka theksuar se transparenca dhe llogaridhënia janë detyrim për çdo institucion dhe zyrtar publik.

Meta u arrestua më 21 tetor 2024 gjatë një operacioni të forcave speciale në Tiranë, ndërsa që nga ajo kohë nuk ka pasur dalje publike. Ai i ka mohuar të gjitha akuzat dhe pritet të përballet për herë të parë drejtpërdrejt me prokurorinë në sallën e gjyqit.