Në Kosova, kryeministri Albin Kurti ka përkujtuar Ditën e personave të zhdukur me dhunë gjatë luftës, duke vënë theksin te dhimbja e familjeve që ende kërkojnë të vërtetën për më të dashurit e tyre.

Në deklaratën e tij, Kurti përmendi raste të shumta familjesh nga Mejë, Krusha e Madhe dhe Krusha e Vogël, si dhe familjen Berisha në Suharekë, duke theksuar se shumë nëna vazhdojnë të jetojnë me pritjen dhe dhimbjen e pazgjidhur prej dekadash.

Ai kujtoi edhe Nënën Ferdonije si simbol të qëndresës dhe Nënën Pashke Krasniqi Markaj, duke theksuar tragjeditë e civilëve shqiptarë gjatë luftës, përfshirë edhe rastin e Mejës në vitin 1999.

Kurti tha se “përgjegjësia për zhdukjet me dhunë bie mbi strukturat shtetërore të Serbisë”, duke kërkuar gjithashtu rritje të presionit ndërkombëtar për zbardhjen e fatit të të zhdukurve.

Sipas tij, Qeveria e Kosovës mbetet e përkushtuar për zbardhjen e fatit të 1565 personave të zhdukur gjatë luftës.

Gjatë ditës, autoritetet dhe familjarët kanë bërë homazhe në nderim të viktimave dhe të zhdukurve të luftës.