Në 45-vjetorin e rënies heroike të Tahir dhe Nebih Mehës, Organizata e Veteranëve të Luftës së UÇK-së ka përkujtuar me nderim jetën dhe veprën e tyre, duke i cilësuar si figura të pavdekshme të rezistencës shqiptare.

Përmes një reagimi publik, OVL e UÇK-së theksoi se familja Meha mbetet frymëzim i përhershëm për brezat që luftuan dhe vazhdojnë ta duan atdheun me të njëjtin ideal. “Sot, në 45-vjetorin e rënies heroike të Tahir dhe Nebih Mehës, OVL UÇK përkujtoi me nderim jetën, veprën dhe qëndresën e tyre të pavdekshme për liri dhe dinjitet kombëtar”, thuhet në reagim.

Tutje, organizata vlerësoi se sakrifica e familjes Meha është një nga simbolet më të fuqishme të qëndresës shqiptare ndër vite. “Sakrifica e familjes Meha mbetet një nga simbolet më të fuqishme të rezistencës shqiptare, frymëzim i përhershëm për brezat që luftuan dhe vazhdojnë ta duan atdheun me të njëjtin ideal. Lavdi”, thuhet në njoftim.