Prokuroria Themelore Publike në Koçan ka pranuar një kallëzim penal ndaj tetë personave, të cilët dyshohen për veprën penale “punë e pandërgjegjshme në shërbim”. Sipas policisë, të dyshuarit, në cilësinë e personave zyrtarë në Inspektoratin Shtetëror të Punës, gjatë periudhës 2022–16 mars 2025 nuk kanë ndërmarrë procedurë për mbikëqyrje inspektuese në objektin hotelierik “Puls” në Koçan, ndonëse kishin detyrim ligjor për ta bërë një gjë të tillë.

Sipas kallëzimit, objekti ishte i vetmi i këtij lloji në territorin e Komunës së Koçanit për 13 vjet, por nuk ishte kryer asnjë kontroll inspektues, në kundërshtim me Ligjin për Mbikëqyrje Inspektuese. Policia thekson se mosveprimi ka mundësuar vazhdimin e funksionimit të paligjshëm të objektit, ndërsa punonjësit kanë qenë të ekspozuar ndaj rreziqeve për shkak të mungesës së kontrollit mbi kushtet e sigurisë dhe shëndetit në punë.

Sipas autoriteteve, këtij objekti i është mundësuar të ushtrojë veprimtari hotelierike në mënyrë të paligjshme dhe të përfitojë dobi pasurore të kundërligjshme në vlerë prej 1.255.977 denarësh. Me këtë kallëzim penal vazhdon hetimi për përgjegjësinë institucionale lidhur me funksionimin e diskotekës “Puls”, e cila ndodhet në qendër të hetimeve pas zjarrit tragjik që ndodhi në këtë objekt.