Detaje të reja janë bërë të ditura nga seanca e sotme me dyer të mbyllura ndaj rastit për Jozefin Markun dhe Kristjan Nikollin, çështje që përfshin përleshjen me Eduard Kuçin.

Këngëtari dhe i afërmi i tij akuzohen për dhunën ndaj Eduard Kuçit, ish konkurrent i Big Brother VIP Kosova, rast që ka bërë bujë në media.

Gjykata tashmë ka caktuar masën “arrest shtëpie” për Markun dhe Nikollin.

Në dëshminë e tij, Marku është mbrojtur duke u shprehur se ka qenë veprim gjaknxehtësie dhe se Kuçi i ka sharë familjen, raporton Top Channel.

“Kërkoj ndjesë për veprimin. E kam kryer në gjaknxehtësi e sipër. Nuk e njihja më parë Eduard Kuçin. E kam njohur në rrjetet sociale, ku më ka sharë familjen”.

“E kam goditur vetëm një herë me shpullë, duke i thënë të më kërkojë falje që më ka sharë familjen”, mësohet të jetë shprehur Jozefin Marku.

Sakaq, Nikolli ka deklaruar se nuk ka qenë i pranishëm në vendngjarje, ndërsa për municionin që i kanë gjetur në banesë ka deklaruar se ishte i ndryshkur dhe në kushte të papërdorshme.

“Unë atë natë që ka ndodhur ngjarja kam qenë në një dasmë, nuk kam qenë prezent në vendngjarje. Unë Jozin e kam mik, këtë e dinë të gjithë. Fishekët që keni gjetur në shtëpinë time ishin të ndryshkur, nuk e di përse ishin aty”, ka dëshmuar Kristjan Nikolli.