Ali Ahmeti ka reaguar pas aktgjykimit të Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit, duke e cilësuar vendimin si “të padrejtë dhe thellësisht zhgënjyes”. Kreu i Bashkimit Demokratik për Integrim u bëri thirrje qytetarëve për maturi dhe unitet, duke kërkuar që pas vendimit të shmangen tensionet dhe përçarjet. “UÇK-ja lindi si përgjigje ndaj shtypjes dhe luftoi për lirinë e Kosovës. Pretendimet e dikurshme për trafikim organesh, që rënduan për vite mbi UÇK-në dhe drejtuesit e saj, nuk u shndërruan në akuza në këtë proces”, shkroi Ahmeti. Ai theksoi gjithashtu se Gjykata i shpalli të pafajshëm të akuzuarit për krime kundër njerëzimit dhe se, sipas tij, këto janë fakte që duhet të kujtohen kur UÇK-ja paraqitet si “ndërmarrje kriminale”. Në reagimin e tij, Ahmeti tha se gjetjet e shkallës së parë do të kundërshtohen në procesin e apelit. “Procesi nuk përfundon këtu. Besojmë se mbrojtja do ta vazhdojë betejën juridike në Gjykatën e Apelit, duke kundërshtuar gjetjet e shkallës së parë dhe duke kërkuar drejtësi deri në fund”, u shpreh ai. Ahmeti e përmbylli reagimin me mesazhin: “Lufta e UÇK-së ishte luftë për liri. Historia e Kosovës nuk mund të rishkruhet dhe sakrifica e një populli të tërë nuk mund të vihet në bankën e të akuzuarve. Me besim në drejtësi, beteja vazhdon në apel!” /REL