Kryetarja e Komunës së Preshevës, Ardita Sinani, ka njoftuar për formalizimin e një bashkëpunimi institucional me Akademinë Alternative Shkencore “Rrënjët Tona”, duke e cilësuar këtë hap si një moment të rëndësishëm për zhvillimin kulturor dhe shkencor të Preshevës.

Në kuadër të një takimi zyrtar, u prit Prof. Inxh. Av. Sazan Guri së bashku me delegacionin e Akademia Alternative Shkencore Rrënjët Tona, ku palët nënshkruan një memorandum bashkëpunimi që synon thellimin e angazhimit në fusha me interes të përbashkët.

Sipas Sinanit, akademikët shqiptarë po dëshmojnë me vepra se Presheva mbetet pjesë e angazhimit të tyre shkencor dhe kulturor. Ajo theksoi se marrëveshja parashikon ruajtjen dhe promovimin e kulturës, gjuhës shqipe dhe trashëgimisë kombëtare, si dhe organizimin e aktiviteteve shkencore e kulturore dhe zhvillimin e projekteve me ndikim afatgjatë për komunitetin lokal.

Një rol të rëndësishëm në këtë bashkëpunim institucional ka pasur edhe Ambasadori i Shqipërisë, Bardhyl Canaj, i cili ka kontribuar në ndërtimin e urave të komunikimit mes palëve.

Ky memorandum shihet si një partneritet serioz dhe një hap konkret drejt forcimit të identitetit kulturor dhe zhvillimit të qëndrueshëm në Preshevë.